Со 4 гласа „за“ и 3 „против“, Државната изборна комисија го прифати приговорот на СДСМ кои наведоа дека актуелниот шеф на државата со својот отчет предвреме ја започнал изборната кампања.
Воедно, вториот приговор на Социјалдемократскиот сојуз, кој се однесуваше на отчетот на владата на ВМРО-ДПМНЕ со кој предвремено ја започнале изборната кампања е одбиен со 2 гласа „за“ и 4 „против“.
На денешното разгледување на овие приговори, следеше жестока расправа помеѓу членовите. Сашо Срцев на самиот старт побара да се отфрли приговорот образложувајќи дека во него има правни недостатоци, но со одбивање за неговиот предлог со 4:3, ДИК продолжи со расправа.
Виолета Дума напомена дека промовирањето на отчетот на Иванов на 14.3.2014, се случи на истиот ден кога бил утврден како кандидат за претстојните претседателски избори, на што опонираше Влатко Сајкоски кој рече дека седницата за тоа време траела со што немало никаков прекршок.
Анета Стефановска пак, ја обвини најголемата опозициска партија, СДСМ дека „од успешната политичка кариера на Иванов, со ваквите приговори, партијата сака да креира своја кампања“.
– Мандатот на Иванов е до 12.мај 2014, така да тој има законска обврска за својот отчет и како претседател има право на тоа, беше еден од аргументите на Стефановска.
Претседателот на Комисијата, Никола Рилкоски потенцираше дека бил кој друг ден пред утврдувањето на кандидатите од страна на ДИК, да е направен отчетот немало да има никаков прекршок, но вака воопшто не станува збор за отчет од затворен тип, особено што бил презентиран пред камерите. Потенцираше и дека Иванов го злоупотребил државниот буџет за финансирањето на отчетот.
Вториот приговор, за владиниот отчет е одбиен со аргументи дека не биле утврдени пратеничките листи, кои воедно ја бираат владата.
„Согласно членот 69а како и дефинициите во Изборниот законик објавувањето и дистрибуирање на печатени материјали со кои се промовираат ставови, програми, платформи и достигнувања на политичките партии и коалиции се смета за изборно медиумско претставување што претставува предвремено отпочнување на изборната кампања“, посочија неодамна од СДСМ.