Граѓаните в недела само еднаш смета да го посетат избирачкото место и да го остварат правото на глас, како за вториот круг од претседателските избори, така и за предвремените парламентарни избори.
Како што информираат од Државната изборна комисија, членовите на избирачките одбори се должни да му укажат на избирачот дека има право да гласа за двата или само за едниот вид избори, но и тоа дека подоцна нема право повторно да се врати на гласачкото место и да гласа.
ДИК вече ја информираше јавноста дека избирачите ќе бидат обележувани со маркер на левиот палец поради забелешките дека се уште постојат остатоци на десниот палец од изборите на 13 април, кај дел од гласачите.
Гласањето в недела почнува во 7 часот и ќе трае непрекинато до 19 часот. По затворањето на гласачките места ќе можат да гласаат само лицата кои во тој момент се затекнале во објектот каде што се гласа.