Претседателката на Собранието на Меѓународниот сојуз Агапи Дика два часа даваше исказ во Обвинителството за организиран криминал за случајот „Рекет“.
На излегување таа се обиде да ги избегне новинарите и излезе од задниот излез на Обвинителството за организиран криминал, а не од влезот каде што ја чекаа новинарите.
На новинарско прашање дали знае дека Боки 13 работел незаконски Агапи одговори само кратко „не“, не коментираше ниту што била повикана во Обвинителството.
На новинарско прашање дали знае каде завршиле парите кои биле уплатени на сметка на Меѓународниот сојуз Агапи исто така само кратко одговори „не“.
Неофицијално таа е повикана во Обвинителството бидејќи како претседател на Собранието на Меѓународниот сојуз е еден од потписниците на дел од договорите што ги склучувал Меѓународниот сојуз.
Претходно во Обвинителството исказ даваше и битолскиот бизнисмен Силјан Мицевски за договорот со Меѓународниот сојуз за изградба на старачки домови. Мицевски неколкупати ја смени својата изјава.
Прво тврдеше дека парите ги уплатил на сметка на пензионерката Лилјана Тодоровска, а потоа дека сумата од 720 илјади евра легнале на сметката на Меѓународниот сојуз.