ДИК донесе заклучок Општинската изборна комисија на Куманово да дозволи да се изврши увид но, не и одземање на избирачките материјал.
Според заклучокот на ДИК увидот треба да се одвива внатре во просториите на комисијата и тоа за оние девет лица од три избирачки списоци кои се предмет по наредбата на истражниот судија.
На увидот потребно е да има присуство и на претставници на политичките партии.
Од ДИК сугерираат дека доколку претставниците на пртиите сметаат за потребно на увидот да се виканат и независни набљудувачи.
Овој заклучок на ДИК беше донесен со 6 гласа „за“ и еден „против“. „Против“ гласаше членот на ДИК од ДУИ, Бедредин Ибраими, кој преходно предложи дека е потребно Судскиот совет да ја преиспита работата на истражниот судија кој направил упад во изборниот процес.
До истекот на законскиот рок, синоќа до 19 часот, до ДИК се поднесени над 200 приговори. ВМРО-ДПМНЕ и СДСМ доставиле по повеќе од 100, ДПА 4, а ДУИ и НДП по 16 приговори.
ДИК е должна во рок од 48 часа по приемот на приговорот да донесе одлука. Подносителот на приговорот по кој одлучувала комисијата може да поднесе тужба до Управниот суд во рок од 24 часа по приемот на решението.
Управниот суд треба да донесе одлука во рок од 48 по приемот на тужбата. Одлуките на судот се конечни.