Една луда ноќ полна со контроверзии и нелогичности ја запечати кариерата на младиот политичар. Диме Спасов ќе остане запаметен како „малиот“ министер кој дивеел со службена кола низ скопските улици, бркан од полицијата, предизвикувајќи две сообраќајки, а не по некаква значајна реформа или политичко влијание.
Диме Спасов, екс министерот за труд и социјална политика, сега дополнителен заменик министер самиот ја запечати својата политичка кариера. Многу тешко би можел да се опорави од скандалозната вечер, кога со службен автомобил ноќе предизвикал дури две сообраќајки бегајќи од полицијата и на крајот оставајќи ја својата сопатничка.
Јавноста се шокираше од апсурдноста на однесувањето на младиот политичар, кој пет дена се криеше од медиумите за да го објасни своето скандалозно поведение. Интервјуто кое завчера го даде за една провладина телевизија наместо да ги расветли, дополнително ги заплетка неговите оправдувања. Приказната дека низ цело Скопје го бркале осудени криминалци со пиштоли, почна да пука по сите шафови и е полна со нелогичности.
Различните верзии за настанот, признавањето дека самиот го возел автомобилот и покрај тоа што МВР објави дека извесен М.Т. (неговиот возач) лажно тврдел дека го возел автомобилот, менувањето на изјавите на неговата сопатничка, се само дел од нелогичностите во неговата приказна, кои во деновите што следат, ќе се расветлат од истражните органи. НОВА се обиде да го контактира Спасов за коментар за случувањата и потребите на оваа сторија, но засега тој не е достапен за коментар.
Кој е Диме Спасов, политичарот кој барем во следните неколку години ќе остане запаметен како „малиот“ која дивеел по скопските улици, а не по некаква значајна политичка реформа која ја направил во трите години додека е на политичка функција.
Иако беше министер неколку години, сепак поради младоста и неискуството, во јавноста за него се ширеше сликата дека важните одлуки сепак ги носи некој друг во партијата. Самиот, не остави особен впечаток за лидерство или независност во водењето на министерството.
Добар ученик и популарен меѓу девојките
Спасов е роден на 7 мај 1985 година во Скопје, оженет со Бојана и татко е на едно дете, Лука. Спасов го има започнато своето образование во основното училиште „Владо Тасевски“ во Козле, каде важи за добар и популарен ученик.
Средно училиште завршил во средното економско и правно училиште „Васил Антевски – Дрен“ во Кисела Вода.
Оние кои го познаваат од тие денови, знаат дека Спасов уште од мал е прилично активен во ноќниот живот во Скопје, вклучен во организација на многу забави и менаџирање на ноќни клубови. За неговата полуларност од младинските денови сведочи и сликата од неговиот средношколски алманах која деновиве стана вирална каде учениците го опишуваат со следната реченица.
„Диме беше менаџер славен, на сите забави беше главен, за школо многу се нервираше, ама професорките ги шармираше“.
Иако како министер во голема мера делува срамежливо, па дури и незабележително, не можејќи никако да излезе од сенката на партијата и големиот лидер, приватно многумина би рекле дека Спасов е шармер, кој воопшто не е повлечен, туку напротив.
По скандалозната вечер, во јавноста големо внимание предизвика и интересот која била младата сопатничка која ноќе била со него, за време на сообраќајката. Како женет човек и политички функционер од владејачката демохристијанска партија, природен е интересот и за приватниот живот на Спасов и затоа дали навистина верува во светоста на бракот, како што тоа често го проповеда.
За многумина беше скандал тоа што тој бил со девојка која не е неговата сопруга во 11 часот навечер, додека предизвикал две сообраќајки и бегал од полицијата. Но за некои, поголемо изненадување низ годините беа пропагирањето на конзервативни вредности во кои времето ќе покаже дали верува и самиот.
„ВМРО-ДПМНЕ ги поддржува само семејните вредности и се залага за зачувување на македонското семејство. За нас брачната заедница треба да биде составена од еден маж и една жена“, гласи еден од постовите на официјалната страна на Спасов.
Кога како Министер за труд и социјална политика, Спасов се ожени со својата долгогодишна љубов од средношколските денови, Бојана, тој на Фејсбук сподели фотографија од бурмите на нивните раце.
Во дел од порталите се појавија информации дека избраничката на младиот министер е внука на Лазар Колишевски, односно ќерка на една од трите негови ќерки. Медиумите го иронизираа фактот дека еден од министрите од редовите на ВМРО-ДПМНЕ, ја посватил партијата со најтесното семејство на комунистичкиот лидер. Наводно младиот брачен пар живеел во бараката на Колишевски на Водно, во која самиот живеел до неговата смрт во 2000-та година.
Кариера градена по учебникот на ВМРО-ДПМНЕ
Спасов ја гради својата политичка кариера според учебникот на владејачката партија, во која се зачленил во средношколските денови. Поточно, во неколкуте институции кои служеа за „билдање“ на кариерите на младите ВМРО-вци, како Агенцијата за млади и спорт, Јавно претпријатие за стопанисување со станбен и деловен простор и Катастарот за недвижности.
Од 2011-та до 2013-та Спасов е претседател на подмладокот на ВМРО-ДПМНЕ.
Според биографијата која е достапна на Википедија, тој по професија е дипломиран правник, а високо образование го стекнал на Факултетот за правни студии “Јустинијан Први”- Скопје. Паралелно со факултетот, во периодот од 2006 до 2009 година работи како референт за извршување и правни работи во Јавното претпријатие за стопанисување со станбен и деловен простор на РМ.
Од 2009 до 2010 година ја извршува функцијата заменик директор на АДСДП – подрачна единица Скопје.
Следните две години е директор на Агенција за млади и спорт. Во 2011-та година, Владата го назначува за државен секретар во Министерството за правда и оваа функција ја извршува до 2012 година.
Од декември 2012 до мај 2013 е помошник на директорот на Агенција за катастар на недвижности, за истата година да стане Министер за труд и социјална политика. Оваа функција ја изршува сè до ноември 2015 година, и по промените кои настанаа со Пржинскиот договор, тој сега е дополнителен заменик Министер за труд и социјална политика.
Спасов е гледан како еден од младите надежни кадри во партијата, кои беа туркани во првите редови, особено по објавата на бомбите. До контроверзната вечер, за неговото име не се поврзуваа никакви скандали или инциденти, што му даваше потенцијал да стане поважен фактор во иднина. Критичната вечер, го промени правецот на неговата политичка кариера.