Во јавноста се зборува дека во трката за прв човек на Бихаќка, ќе влезат три лица. Но, додека за другите двајца сеуште се шпекулира кои би можеле да бидат, членот на Извршниот одбор и актуелен Заменик министер за финансии Димитар Ковачевски и официјално за „Фокус“ вчера ја потврди кандидатурата на која, како што изјави, ќе работи овие 7 дена.
– Во рокот од седум дена, ќе подготвам програма и ќе поднесам кандидатура за претседател. СДСМ е партија со најголем кадровски потенцијал и има поголем број истакнати членови кои би биле одлични кандидати. Постапката е демократска и секој што ги исполнува условите може да се кандидира. Она што е најважно, сите треба да се обединиме околу избраниот претседател, изјави Ковачевски.
На Ковачевски веќе се гледа како на фаворит на внатре-партиските избори за лидер на СДСМ и на најизгледна фигура за наследник на Заев на премиерската функција.
Кој е Димитар Ковачевски ?
Ако треба во неколку зборови да се опише Димитар Ковачевски , тоа би изгледало вака: Економист по вокација, со добри релации со Заев со кого биле колеги на Економскиот факултет на УКИМ за време на студирањето и своевремено соработник на Црвенковски во СДСМ.
И, ова се цени за сосема доволен аргумент што му ја дава предноста на Ковачевски пред другите кои и да се тие, кој би придонесол за очигледно толку потребното обединување внатре во СДСМ, на кое повикуваа сите партиски функционери особено по согледувањето на резултатите по првиот круг од локалните избори. Што се однесува до партискиот живот на Ковачевски, треба да се спомене и тоа дека тој е долги години во СДСМ важи за етаблиран член на партијата со долгогодишно членство во ИО.
Но, предноста Ковачевски ја црпи и од исклучително богатата биографија која вклучува образование на престижни факултети надвор од државата меѓу кои на Харвард и од работното искуство на директор во два телекомуникациски оператори.
Образование и едукација
Средното образование го започнува во гимназијата „Гоце Делчев“ во Куманово, а го завршува во гимназијата „Вотервил Елизиан“ Мористаун во Минесота, САД. Во 1998 година дипломира на Универзитет „Св. Кирил и Методиј“, Скопје, Економски Факултет. Магистерските студии по економија, Ковачевски ги завршува во Скопје, а докторските исто така по економија , ги завршува во Црна Гора на државниот Универзитет во 2008 година , по што се стекнува со титулата доктор на економски науки.
Универзитетот Харвард во неговата биографија е вклучен поради усовршувањето на Школата за Бизнис. На Техничкиот Универзитет во Минхен, Ковачевски го апсолвира Европскиот претприемнички колоквиум. Во Ротердам, Холандија го посетува Школото за Менаџмент при Еразмус Универзитетот како и ЕАДА Бизнис Школото во Барселона, Шпанија.
Во реалниот сектор, Ковачевски искуството почнал да го стекнува во Македонски Телеком на позицијата директор на управување со маркетинг и продажба, на маркетинг комуникации и на резиденцијална продажба, по што станува извршен директор на Оне Вип Македонија, дел од Телеком Австрија Групацијата.
Димитар Ковачевски е роден 1974 година во Куманово, е доктор на економски науки, вонреден професор на Факултетот за деловна економија и менаџмент на Универзитетот Американ Колеџ Скопје. Тој е предавач на додипломските, последипломските и докторските студии и автор на голем број научни трудови од областа на економија и менаџмент објавени во меѓународни научни списанија и конференции, се наведува во неговата официјална биографија на сајтот на Министерството за финансии.
Зборува течно англиски јазик, се служи со германски јазик и користи низа интегрирани информациони системи.
Во 2020 година беше дел од Економскиот Советот на Владата на Република Северна Македонија за справување со економски последици предизвикани од пандемијата од вирусот COVID-19
Димитар Ковачевски е син на поранешниот градоначалник на Куманово, Слободан Ковачевски, кој беше и македонски амбасадор во Црна Гора.
Откако во петокот владејачкиот Социјалдемократски сојуз ја утврди оставката на претседателот на партијата Зоран Заев, почна постапката за кандидирање за претседател на партијата и беа распишани внатрепартиски избори по пат на непосредно гласање, што ќе се одржат на 12 декември.
(М.Т.)