Техничкиот премиер Емил Димитриев, по средбата со амбасадорите на САД и ЕУ, Џес Бејли и Аиво Орав, на прес-конференција потенцираше дека исполнети се условите за избори на 24.април, и дека Владата со која тој управува во моментов, забрзано работи на тоа.
– Тоа ќе бидат фер, демократски и кредибилни избори по сите европски стандарди. Стандардите се јасни и прецизни, има услови и има и време и ресурси сето тоа да се организира, порача Димитриев.
Во однос на прочистувањето на Избирачкиот список, Димитриев рече дека сите партии освен СДСМ се откажале од амандманите кои ги имаат поднесено, ДИК ја утврдил предлог методологијата едногласно со согласност од сите членови од ДИК, со поддршка дури и од оние кои биле предложени од страна на СДСМ, и ја повика најголемата опозициска партија да не го блокирала донесувањето на методологијата и прочистувањето на списокот.
Тој ја поздрави партијата ВМРО-ДПМНЕ во која до неодамна ја извршуваше функцијата Генерален секретар, дека дала бланко поддршка за било кој европски закон во однос на медиумите да се имплементира во Македонија.
– Македонија цели кон Европската Унија и нејзините стандарди, и оттука ја поздравувам одлуката на ВМРО-ДПМНЕ практично да покаже целосна отвореност за прифаќање на било кој закон од било која земја членка на ЕУ, рече тој.
Техничкиот премиер порача и дека никој не смее да прави притисок за гласање врз никого и ако постои и се докаже такво нешто таа личност мора да биде санкционирана.
Одговарајќи на новинарско прашање, зошто лидерот на ВМРО-ДПМНЕ, Никола Груевски се појавува заедно со премиерот на владини настани, Димитриев одговори дека елементарно право е на секој кој работел на тие проекти да присуствува.
Ова прашање следуваше, откако амбасадорите денеска пред Димитриев побараа строго одделување на партијата од државата.