Министерот за надворешни работи на Република Македонија, Никола Димитров, вечерва, во Виена, ќе има средба со министерот за надворешни работи на Грција, Никос Коѕијас.
Двајцата министри утре ќе имаат заедничка средба со личниот пратеник на Генералниот секретар на ОН, Метју Нимиц.
Со тоа, денеска и утре стартуваат преговорите за решавање на спорот со името.
Министерствата за надворешни работи на Република Македонија и Грција минатата недела во Скопје го одржаа седмиот состанок, како дел од Мерките за градење на доверба меѓу двете земји.
За сите отворени прашања во рамките на преговорите ќе разговараат Димитров и Коѕијас, изјави портпаролот на грчката Влада во однос на тоа што ќе се најде на масата разговори на двајцата министри за надворешни работи на нивната следна средба, јавува дописникот на МИА од Атина.
Сложено име и за надворешна и за внатрешна употреба, за кое треба уставна промена и повлекување на секакви сомнежи за иредентистички ставови, е рамката што го гарантира затворањето на проблемот, рекол грчкиот премиер Алексис Ципрас, на состанокот на пратеничката група на СИРИЗА, пренесува МИА.
Премиерот Зоран Заев минатата недела изјави дека Владата е подготвена за име со географска одредница.