По 27 години, евдај ги врзавме двете страни и ако сега отвориме нов процес на преговори, ризикот да ја испуштиме оваа шанса ќе биде огромен – одговори министерот за надворешни работи Никола Димитров во реплика на говорот на пратеникот Панчо Минов.
Минов предложи да се интервенира во Договорот во делот за имплементација на новото име Северна Република Македонија за внатрешна употреба.
-Ни лидери ни свети лидери не ми требаат за да застанам зад интересите на својата држава. Географската одредница Северна, од нас нема да направи нови луѓе, кажа Димитров.
Минов предложи нови рокови за имплемантација на новото име.
-Употребата во меѓународни организации на името Северна Република Македонија да се применува по ратификација на спогодбата во Парламентот на Грција и ратификација на пристапните преговори за членство во НАТО во сите земји членки на Алијансата. За внатрешна употреба, прифаќањето на новото име да важи по финализирање на сите поглавја со ЕУ во рок од 5 години, предложи пратеникот Минов.
Во Договорот со Грција, сега се предвидува имплментацијата на новото име за внатрешна употреба да се примени 5 години по почеток на пристапните преговори со ЕУ.
Минов кажа дека ова е услов за тој да гласа за уставните измени – во спротивно рече дека ќе гласа „против“.
Артан Груби од ДУИ им порача на пратениците од ВМРО ДПМНЕ „да се надминат себеси и да гласаат „За“. Тој се дистанцираше од говорот на Бранко Манојловски и кажа дека за „ДУИ, помирување е можно само во Брисел – да се помириме дека нема друг пат освен ЕУ и НАТО“ кажа Груби.
Претходно, неговиот сопартиец Бранко Манојловски кажа дека „вмровците се прекрасни луѓе кои зависат од партијата и државата на секоја вмровец кој ќе гласа „за“ да ја гарантира нивната безбедност“.
Манојловски уште додаде дека треба да им се даде и амнестија на оние кои сториле кривично дело, затоа што ќе биде поевтино отколку да се затворат.
Претпладнево од дискусија се откажаа и останатите пратеници од ВМРО ДПМНЕ – на листингот за дискуија е само Нола Исмаиловска Старова од ВМРО ДПМНЕ која не е во Собранието.
Се очекува расправата за владиниот предлог за уставни измени да трае до петок.