Министерот за надворешни работи на Македонија, Никола Димитров, смета дека одлуката на косовската влада да издвои буџетски средства за финансиска поддршка на семејствата на осудените државјани на Косово во случајот „Диво Насеље“ е надвор од духот за градење европска иднина.
Како што рече Димитров денеска на средбата со министерот за европски прашања на Република Косово, Зурата Хоџа на маргините на регионалната конференција „Градење капацитети и регионална соработка во процесот на европска интеграција на земјите од Западен Балкан“, таквата одлука не е во духот на градење европска иднина за регионот засновано на владеење на правото, што е заеднички интерес на двете земји.
На средбата биле разменети мислења за регионалната и билатералната соработка, кои бележат подем, а во тој контекст се разговарало за можностите за унапредување на соработката со Република Косово на планот на евроинтеграциите, и за споделување на стекнатите искуства на Република Македонија на тој пат.