Откупот на млеко во Дебар е нормализиран, во тек е пролетната сеидба на пченка и сончоглед за што земјоделските аптеки ќе останат отворени, а за македонското јагне се бараат алтернативни пазари. Ова се пораките што министерот за земјоделство, шумарство и водостопанство (МЗШВ), Трајан Димковски ги испрати од денешната прес-конференција во Владата како одговор на новонастанатата ситуација со коронавирусот.
„Дневно се собираат и откупуваат по околу 1.800 литри млеко во Дебар и дебарско. Количините ги земаат камиони од млекарницата Трница“, рече Димковски во врска со состојбата со откуп на млеко во општините Дебар и Центар Жупа.
Првиот човек на МЗШВ истакна дека има доволно пченица во стоковите резерви и во млиновите, потсети дека границите за проток на стоки и трговија не се затворени и нагласи дека нема потреба од паника, бидејќи пазарот се снабдува во континуитет. Според него, доколку се процени за потребно, можно е да се воведат и интервентни мерки.
Димковски, меѓудругото, истакна дека интензивно се бараат алтернативни пазари за македонското јагне, со оглед дека шпицот е за десетина дена, а едни од извозните дестинации би можеле да бидат Ирак и Јордан.
„Покрај традиционалните пазари како Италија, Хрватска и Грција, алтернативни пазари се Ирак и Јордан, со кои нашите трговци се обидуваат да воспостават врски кои и досега ги имале за да може и таму да се извезува. Наша намера е јагнето да биде извезено. Извозот во Италија во моментот се одвива забавено, поради проблемот што го имавме со транспортот. Ја следиме состојбата и, секако, доколку има потреба, со соодветни мерки ќе помогне на сточарите да ги покријат загубите што ќе бидат донесени заеднички и во комуникација со сточарите и откупувачите на јагне“, посочи Димковски.
Тој соопшти дека пролетната сеидба на пченка и сончоглед е во тек. Земјоделските аптеки, напомена, нема да бидат затворени за да можат земјоделците редовно да се снабдуваат со заштитни средства.
„Сеидбата треба да продолжи непречено, но и во овој дел треба да се почитуваат препораките на Владата за заштита од коронавирусот. Набавката на сточна храна, со регулирање на протоколите за транспорт, ќе се одвива непречено. Истото важи и за набавка на репроматеријали односно заштитни средства, ѓубрива, семе, саден материјал и друго“, посочи Димковски со цел, како што дополни, земјоделците да можат тековно да набавуваат сé што им е потребно за непречено извршување на редовните активности.