Што се однесува до медиумите, како едно од најважните прашања кое и понатаму е отворено при имплементацијата на Договорот од Пржино, Илија Димовски, член на Извршниот комитет на ВМРО-ДПМНЕ, денеска ја покани СДСМ да посочи еден закон за медиуми кој се практикува во земјите од Европската унија, и неговата партија ќе го прифати и изгласа.
Одговарајќи на новинарско прашање со оглед на тоа дека ВМРО-ДПМНЕ постојано се повикува на европска пракса, зошто предлозите на белгискиот медијатор Питер Ванхауте во поглед на медиумите, се неприфатливи, Димовски одговори дека такви немало никаде во Европа.
Потенцирајќи од страна на новинарите, дека Ванхауте сепак ја претставува Европската унија во посредништвото меѓу работните групи на четирите партии, а неговите предлози посочуваат и на владиното рекламирање, Димовски најпрво кратко посочи дека Белгиецот бил по професија социолог.
– Оној предлог закон кој што ние го подготвивме, а е во насока на регулација на тоа како ќе се делат средствата за владино информирање, е работен врз база на австриски закон. Тоа постои во Австрија. Тоа постои и во Германија, одговори меѓу другото тој.
Во однос на владиното рекламирање во медиумите, координаторот на Пратеничката група на ВМРО-ДПМНЕ во Собранието, вели комерцијалните медиуми се приватни фирми а концептот кој го предлага најголемата партија на власт е растеретен од било каква политичка волја или одлука, напротив ќе бил поддршка посебно на локалните и регионални медиуми кои што за разлика од националните медиуми, се во многу тешка ситуација, а се од врвен интерес за да се запази информирањето на граѓаните на локално и регионално ниво.