Координаторот на Пратеничката група на ВМРО-ДПМНЕ во Собранието, Илија Димовски денеска ја повика опозициската СДСМ уште денес да ја прифати методологијата за прочистување на Избирачкиот список.
– Помина уште еден ден во кој СДСМ не презема никакви активности за да се прочисти тој Избирачки список. Како што потенциравме пред неколку дена, ДИК минатата недела усвои методологија. За оваа методологија гласаа членовите на ДИК, дури и оние кои се таму по предлог на СДСМ. За сите политички партии оваа методологија и суштински и формално е прифатлива, но СДСМ упорно ја кочи иплементацијата со недавање на свое позитивно мислење, изјави Димовски.
Тој вели дека СДСМ спроведува статегијата на проблеми и хаос секаде каде што можат и секаде каде што нема и ја обвини опозициската партија дека сака да ја продолжи политичката криза и агонија во Република Македонија.
– Би потенцирал дека целиот аспект на спроведување на избори, во контекст на улогата, правата и обврските на медиумите и политичките партии е веќе прецизно регулирана со новиот Изборен закон за кој во Собранието на Република Македонија гласаа сите четири големи партии, вклучително и СДСМ. Во овој закон беа инкорпорирани огромен број на барања и предлози на СДСМ, рече Димовски кој дополни дека ВМРО-ДПМНЕ ќе го прифати било кој закон за медиуми од државите во ЕУ без никакви интервенции во него.
Прифаќањето на методологијата за Избирачкиот список, СДСМ неодамна преку својот потпретседател и учесник во работните групи на партиите, Дамјан Манчевски ја услови, со тоа што во име на партијата тој рече дека ќе отстапат од сите свои забелешки доколку ВМРО-ДПМНЕ го прифати предлогот за медиумската реформа на белгискиот посредник Питер Ванхауте.