Членот на Амстердамската тројка, неформалната група за реформи во ВМРО-ДПМНЕ, Перо Димшоски денеска за бугарската новинска агенција БГНЕС изјави дека тие ќе
продолжат да се борат додека не ја вратат слободата и демократијата во Македонија.
Димшоски вели дека тука нема да се застане и оти само со преодна Влада ќе се создадат услови за излез од политичката криза.
– Претседателот на ВМРО-ДПМНЕ Никола Груевски ни одговори преку медиумите дека тој добил најмногу гласови во историјата на партијата и дека можеме да му се спротиставиме на избори. Сметаме дека тој треба да се повлече достоинствено, и покрај изборните резултати, кои, патем, не беа признати од ниту една опозициска партија. Исто така во моментов нема услови за какви и да било избори во Македонија. Никола Димитров детално објасни како се користат државните институции и нивните капацитети во корист на владејачката партија во минатите изборни циклуси, вели Димшоски за БГНЕС.
Тој вели дека голем проблем во Македонија се медиумите, бидејќи најголемиот дел од нив се контролирани од власта.
– Во Македонија имаме ограничено присуство поради контролата над медиумите, со кој располага власта и поради тоа сме принудени да контактираат со Македонија преку светските и регионалните медиуми. Тоа е тешка и макотрпна работа, но дава одлични резултати. Сѐ повеќе успеваме да влијаеме врз светската демократска заедница и да ја привлечеме на наша страна. Овие активности ќе продолжат додека во Македонија не бидат обновени демократијата, слободата и човековите права, порачува Димшоски.
Поранешниот функционер во Владата на Груевски вели дека во Македонија Амстердамската тројка има поддршка од страна на младите и образовани луѓе кои користат модерни средства за комуникација.
– Долгорочно нашата активност и напори ќе бидат насочени кон брзо надминување на споровите што ги имаме со Грција, подигање на нивото на соработка и пријателство во односите со Бугарија, со која сѐ уште немаме задоволителни економски врски и прифаќање на нашата земја во НАТО и ЕУ, каде нашето внимание ќе биде повторно зајакната соработка со соседите, додека не го претвориме овој дел од Балканот во движечка економска сила на Европа, и наместо да имаме одлив на работна сила, како што е сега, да имаме наплив на работна сила. Ова ќе оствариме преку надминување на историските и други предрасуди и преориентација на регионот кон перспективите што ги носи глобалната економија, изјавил Димшоски за бугарската новинска агенција.