Со резултат од 3:2 македонското МНР го собори на теренот тимот на дипломати на Форин офисот во пријателски фудбалски натпревар викендов во Скопје.
Дипломатите се пресметаа, но не во политиката туку во фудбалот. Тим на Форин офисот од Лондон деновиве гостува во Република Македонија на пријателски натпревари со македонските институции.
Тимот на македонското Министерство за надворешни работи предводен од министерот Никола Попоски им покажа на Британците што значи динамична игра, стратегија и истрајност. На британската страна заигра и амбасадорот во Македонија Кристофер Ивон како поддршка на тимот од Лондон.
Во рамки на својата посета фудбалскиот тим од Лондон играше против тимот на армијата, поранешни фудбалери, а во понеделник ќе си ја проба среќата и против тим на македонската полиција.
Фудбалските натпревари се одржуваат како дел од активностите за одбележување 20 години дипломатски односи помеѓу Британија и Македонија. Дипломатската канцеларија во Скопје, Британија ја отвори кон крајот на 1993 година.