Антикорупциската комисија денеска побара да се поништи огласот за вработување на Клиниката за стоматологија „Св. Пантелејмон“ од 2018 година, да се разреши директорката Амела Цана и да се поведе постапка за кривична одговорност против неа за злоупотреба.
Антикорупциската комисија утврдила дека вработените на овој оглас не биле избрани по објективни критериуми, туку директорката го искористила своето дискреционо право.
Софка Дојчиновска член на Антикорупциска која го води овој предмет кажа дека директорката на Стоматологија која била повикана да одговори на наводите од пријавата која била доставена до Комисијата од лице кое било одбиено на огласот, „не ги уверила дека при изборот на кандидати кои требало да бидат вработени се водела од објективните критериуми“. Ова наведува на заклучок дека директорката изборот на 8 нововработени го направила само врз основа на своето дискреционо право кое, како што потсети Дојчиновска не треба да биде злоупотребувано.
Дојчиновска исто така кажа дека Антикорупциската со барањето за поништување на огласот и разрешување на директорката ќе се испрати порака дека ќе се санкционираат сите огласи во кои ќе се препознае политичко влијание.
-Време да влеземе во студена вода и да почнеме да ги применуваме одредите кои ни ги дава законот, кажа Дојчиновска.
За своите одлуки, Антикорупциската комисија ќе ја извести и Владата.