Според министерот за транспорт и врски, Миле Јанакиевски, таксистите во Македонија треба да знаат англиски јазик, бидејќи првиот контакт кој странските туристи го имаат во земјата е токму со нив. Јанакиевски изјави дека трошоците за учење на основен англиски јазик ќе бидат покриен од општините и министерството, а таксистите ќе мора да го совладаат најдоцна до 1 јануари 2017 година додека до 2019 ќе мора да научат еден степен повеќе од јазикот.
Од анкетата на НОВА, заклучокот е дека помеѓу таксистите мислењето е поделено. Постарите велат со патниците никогаш немале проблем и дека лесно се разбираат, напоменувајќи дека тие ги знаат адресите однапред а доколку не се разберат вокално, користат разни средства за разбирање но тоа трае кратко и на крај се доаѓа до посакуваната дестинација. А со учењето на англискиот јазик, во поодминати години, не се согласуваат. За други – јазикот треба да се знае, барем основните работи.
– Треба да се запрашаме која е позадината зад сето ова, вели еден од таксистите. Јас возам толку многу години и сум немал проблем, а сега одеднаш требало да зборувам странски јазик за да се разберам, потенцираше тој.
Министерот Јанакиевски за овој предлог вели таксистите ќе имаат период од три години за прилагодување. Јанакиевски напомена дека министерството за транспорт во соработка со единиците на локалната самоуправа во наредниот период ќе спроведат голем број обуки со цел да се зајакнат такси-услугите, пред се во туристичките центри како Скопје, Охрид, и Струга.