Одливот на млади лекари во странство најмногу се случува заради политичката состојба во државата, покажува истражувањето на Хелтгрупер. Дури 70 проценти од лекарите кои заминале во странство се изјасниле дека биле принудени да се вработат само ако се член на одредена политичка партија. Она што е фрапантно, исто така е дека 90 од анкетираните , се изјасниле дека не размислуваат да се вратат назад во земјата. Според податоците од Лекарската комора, 600 лекари ја напуштиле државата во последните пет години, но оваа бројка не е прецизна бидејќи се однесува само на тие кои побарале документ со кој с е потврдува нивниот статус. Школувањето на секој од нив државата ја чини 60 000 евра.
„Странските држави имаат начин како да ги привлечат лекарите кои таму одат како готов кадар. Македонија нема стратегија како да ги задржи лекарите и с ето тоа за некоја година ќе се одрази катастрофално кога ќе почнат да се пензионираат сегашните лекари“, изјави Владимир Лазаревиќ од Хелтргупер.
Покрај лошата политичка клима, лекарите ја напуштаат државата и заради економската заработка и можноста за професионален развој. Ваква состојна е констатирана и во Косово, Србија и Албанија.
„Во Србија младите лекари заминуваат од државата најмногу заради економски причини, односно ниските плати. Тие имаат можност да се вработат само доколку некој лекар се пензионира“, изјави Маја Крстиќ, Србија.
Истражувањето кое беше спроведено во Македонија, Албанија Србија и Косово отвори повеќе прашања, отколку што даде одговори, рече Јехуда Неумарк, директор на школото за Јавно здравје во Ерусалим.
Поради овој тренд Македонија и другите земји од регионот се соочуваат со загуба на медицинскиот кадар кој ќе се одрази негативно врз здравствениот систем и квалитетот на здравствените услуги. Во сите четири земји кои се опфатени со истражувањето, не само што има тренд на миграција на лекарите во странство туку и од помалите градови кон главните.
За споредба, од Србија, секоја година се отселуваат по околу 600 лекари, во следниот петгодишен период планираат да заминат уште 3.000, а 2.600 се водат како невработени. Во Албанија работите се уште полоши. Според податоци во оваа држава има 1,1 доктор на 1.000 жители, а невработеноста е висока бидејќи вработувањето оди по партиска линија. Во Косово пак, има најмалку податоци, затоа што нема институција која може да ги собере тие податоци. Таму од 2009 та до 2013 година, за 81 процент е зголемен бројот на лекарите кои заминале во странство, најчесто во Германија како најпосакувана дестинација.
Целта на ова истражувањето е да се утврдат кои се причините заради кои лекарите заминуваат од сопствените држави.
Хелтгрупер истражувањето го направи со помош на средства обезбедени од универзитет во Швајцарија во рамки на Регионалната програма за истражувања и со Европскиот универзитет од Израел.