Три дојави од граѓани пристигнале до подрачната канцеларија на народниот правобранител во Битола, за проблематични ситуации при гласањето во Битола и Ресен, јавува Вест.
Според заменик народниот правобранител, Лилјана Илиевска, ресенчани се пожалиле дека на одредено изборно место во Ресен, се носат гласачи во автомобили со албански регистарски таблички.
Според полицијата, немало тепачка туку само вербална расправија.
„Имавме дојава од граѓанин на Ресен кој укажа дека во избирачкото место во основно училиште Мите Богоевски, настанала тепачка и дека се појавуваат гласачи кои дотогаш не биле некогаш на тоа гласачко место. Од наша страна веднаш беше контактирано со полициската станица во Ресен од каде не информираа дека не се работело за тепачка, туку за вербална расправија помеѓу две лица од различна политичка партија во непосредна близина на гласачкото место поради носење на гласачи со патнички возила“, изјави Илиевска.
Според неа до канцеларијата пристигнал уште еден телефонски повик од граѓанин за истото избирачко место.
„Граѓанинот укажа дека на ова гласачко место се носат лица за гласање со патнички возила со албански или бугарски регистарски таблички, кои никогаш не биле видени ниту гласале на тоа избирачко место“, додаде Илиевска.
Како што јавува Вест, за Битола канцеларијата на народниот правобранител добила дојава од член на избирачки одбор од избирачкото место 075, дека одземен е список со граѓани од страна на овластен преставник на подносител на листа.