Партијата Демократска обнова на Македонија е отворена за соработка при изготвувањето на предлог за измени на Изборниот законик, соопштуваат од партијата.
Ставот на ДОМ во поглед на изборниот модел со една изборна единица се совпаѓа со оној на Демократскиот сојуз, а предлагаат Изборниот законик да се промени и со одредба за 50% жени и мажи на листите.
– Ова е главна поента на кампањата на Форумот на жени на ДОМ, започната на 8 март годинава. Истовремено, ова е и заложба на Обединетите нации, како препорака до сите земји, за да се постигне родова рамноправност, соопштува ДОМ.
Што се однесува до една изборна единица, се вели во соопштението до медиумите, има повеќе аргументи, а пред се демократизација на општеството.
Тоа значи поправедна распределба на пратеничките места на повеќе политички субјекти, без изгубени гласови.
– Тоа води до пошаренолика политичка сцена и намалување на длабокиот јаз помеѓу двете најголеми опции. Владите што би се формирале би биле похетерогени, со поголема демократичност, толеранција и слух за потребите на различни општествени групи, забележува Демократската обнова на Македонија.
Според партијата, отворените листи значат слобода на избор на граѓаните при гласањето, зашто ќе се цени и личноста, а не само партијата, што пак ќе придонесе за демократизирање на самите партии и поголема одговорност на избраните кандидати пред граѓаните.