Според експертите, Југохром во воздухот секојдневно испушта по 30 тони прашина. Претседателката на ДОМ Лилјана Поповска најави приватна тужба против Југохром откако Тетовското јавно обвинителство ја одби кривичната пријава која оваа партија ја поднесе против комбинатот од Јегуновце, поради работење без еколошки стандарди.
Пријавата вели Поповска е неосновано одбиена а тужбата ќе биде поднесена наскоро.
– Од обвинителството ни рекоа дека немаат обврска по службена должност да постапуваат на основа на поднесената кривична пријава, па така кривичната ја отфрлија. Јас не се согласувам со ваквата одлука. Се работи за загадување на животната средина и природа според член 218 од кривичниот законик и загрозување на животната средина со отпадни материи според член 230, и дефинитивно тие по службена должност треба да постапат согласно пријавата. Затоа ние како партија одлучивме да поднесеме приватна тужба, која е веќе подготвена, изјави претседателката на ДОМ Лилјана Поповска.
Електроинжинерот Илјаз Илјази од Институтот за животна средина при Универзитетот на Југоисточна Европа кој своевремено работел во Југохром, вели дека дневно комбинатот од оџаците испушта 30 тони прашина. Доколку Југохром работи според еколошки стандарди, концетрацијата на прашина во воздухот би се намалила на 800 килограми.
– Ако имаме 30 тони прашина дневно од Југохром, тогаш во воздухот секојдневно на територијата на општина Полог која опфаќа површина од околу 1000 километри квадратни, се акумулираат 250 микрограми ПМ 10 честички. Во ситуации кога немаме ветер и дожд немаме ниту циркулација на воздухот, па така математички пресметано, за цела недела во воздухот само од Југохром се таложат 1500 миккрограми ПМ 10 честички, што е за 30 пати повеќе од дозволената вредност, изјави елетроинжинерот Илјази.
Илјази вели дека за технолошкиот процес Југохром користи ќумир. На таков систем работат печките. Европските земји го отфлуваат ваквиот начин на прозводство. Затоа тешката индустрија која работи на ваков принцип се одлучува да произведува во неразвиени земји како што е Македонија.
– Поради ваквиот производствен процес, Југохром енормно го загадува воздухот. Но има и други загадувачи. Тука е виновна и општината, која недоволно ја одржува хигиената во градот. На пример, пред 10 тина години се чистеа улициите во Тетово, сега тоа го нема. Се уште нема прецизни податоци кој колку загадува. Поради тоа треба да има и мобилни станици за мерење на аерозагадување, кои би се поставиле на различни места. Треба да постои и независно тело кое ќе го мери квалитетот на воздухот, само на тој начин би добиле реална слика за загадувачите согласно барањата на Европската унија, дополни Илјази.
Од движењето Еко Герила, велат дека нема да престанат со протестите против загадениот воздух, се додека Југохром не постави филтри на оџаците а општината не преземе содветни мерки за намалување на аерозагадувањето.
– Никој не презема соодветни чекори за намалување на аерозагадувањето. Ниту владата ниту општината. Во Тетово нема јавен превоз, нема паркинг, нема никакво зеленило. Се додека не се воспостави ред во овој правец, ние ќе продолжиме со нашите герилски акции. Наскоро ќе организираме блокирање на улиците, каде неколку часа нема да ги пуштаме да поминуваат само тешките товарни возила, изјави Аријанит Џафери од движењето Еко Герила.
Владата, на комбинатот Југохром, иако не ги исполнува еколошките стандарди во два наврати му ја продолжи дозволата за работа, под услов да започне процедури за поставување филтри на оџаците.
Раководството на комбинатот, не го испочитува првиот рок даден до крајот на октомври минатата година. Вториот рок истекува на 30 април годинава, но дали е започната некаква постапка околу поставувањето на филтрите, од комбинатот Југохром како и многу пати досега не се достапни за коментар.