Учителки, студенти, претседатели на месни заедници, административци, директори на локални подружници на државните институции, автомеханичари, но и невработени членови на младината на партијата се дел од луѓето кои дале донации од по илјада евра како физички лица во кампањата на коалацијата предводена од ВМРО ДПМНЕ. Имињата на донаторите се објавени во привремениот извештај за финансирање на кампањата кој партиите имаат обврска да го достават до Државната изборна комисија.
Нова ги истражуваше имињата на списоците со донатори со цел да дознаеме повеќе за мотивите за донирање на овие луѓе, нивните примања и начинот на кој ги уплатиле парите. Исто како и на претходните парламентарни избори, сите донатори парите ги уплаќале во исти денови, односно половината донирале на 5 Март, а другата половина на 8 Март. Некои од луѓето со кои Нова се обиде да разговара, а кои можете да ги слушнете во видеото погоре, потврдија дека донирале за партијата, додека некои избегнаа да разговараат на темата.
Некои не можеа да се сетат кога точно донирале, а еден од нив тврди дека во банка донирал илјада евра пред месец и половина до два месеца, а во тој период изборната кампања не беше ниту започната, ниту пак банкарските сметки беа отворени. Според извештајот на ДПМНЕ тој донирал на 8 месецов.
Донирав, да. Јас сум знаете вработен, функционер, па затоа донирав. –Како дониравте? Во банка, се разбира. Кога дониравте? – Па не знам точно, ама има месец и половина до два, вели еден од донаторите со кого разговорот можете да го видеото.
На списоците недостигаат звучните имиња на високите партиски функционери. Еве некои од луѓето кои Нова ги провери, а кои дале по илјада евра од своите примања за партијата.
Засега ова се првичните извештаи кои партиите ги доставуваат до ДИК. Досега донирале околу сто физички лица за ВМРО ДПМНЕ, претежно од Кичево и Кисела вода. Простор за донации има уште, а од иксуствата од претходните избори, обично донаторските списоци бројат и по повеќе од петстотини лица.
Донации од фирми во моментов нема, а немаше ниту на претходните избори. Профилот на донатори на партијата беше сличен како и досега –административци, учителки, редари, но и многу земјоделци, најчесто лица кои добиле субвенции од државата.
А реакциите на донаторите во претходнтие циклуси кои или не знаеја дека се донатори или не знаеја колку пари донирале и на каков начин, никогаш не го добија заслуженото внимание од институциите кои треба да го истражуваат финансирањето на кампањи и партии.
Собрале 49 илјади евра, а потрошиле 730 000 – ДПМНЕ пак во минус
Коалицијата предводена од ВМРО ДПМНЕ под услов да не прави повеќе трошоци, би требало да обезбеди уште 680 000 евра донации за да може да го покрие минусот кој го пријави. Според првичните привремени извештаи, од донациите успеале да соберат речиси 49 илјади евра, а потрошиле дури 730 000 евра.
На минатите парламентарни избори ВМРО ДПМНЕ пријави минус од околу 3 милиони евра. Ниту една институција не се зафати да го истражи спорниот минус кој многумина експерти го оценија за незаконски, иако неправилностите ги констатираше и државниот ревизор.
Во продолжение на Нова ќе следат анализи и на привремените извештаји на другите партиски субјекти – учесници во изборната кампања