Достоинство: Џафери да каже што се случи во Вејце
За време на конфликтот во 2001-та година, таму загинаа Роберт Петковски, Бобан Трајковски, Миле Јаневски, Игор Kотески, Марјан Божиновски, Илче Стојановски, Кире Костадиновски и Бошко Најдовски. Патролирајќи во областа наишле на заседа.
Според извршената обдукција, било утврдено дека телата на убиените полицајци и војници по смртта биле дополнително масакрирани.
Од партијата Достоинство денеска положија цвеќе пред споменикот на бранителите и го повикаа министерот за одбрана Талат Џафери да каже нешто повеќе за овој настан. Според Достоинство, токму Џафери тој ден бил дежурен во касарната во Тетово и тој лично ја испратил патролата од касарната кон селото Вејце.
Џафери не присуствуваше на одбележувањето на годишнината од настанот пред два дена. На спомен обележјето пред баталјонот за специјални намени во касарната „Илинден“ во Скопје венци со цвеќе положија делегации на министерството за одбрана и Генералштабот на АРМ предводени од началникот на Генералштабот Горанчо Котески и државниот секретар во министерството Сашо Стефаноски, како и семејствата на загинатите припадници на АРМ.