Демократската Партија на Турците на Македонија со изненадување и загриженост ја прими одлуката на Претседателот Ѓорѓе Иванов со општ акт да се прекинат сите кривични постапки против лица од власта и опозицијата произлезени од незаконито прислушкуваните разговори, се вели во соопштението до медиумите.
„Демократската Партија на Турците на Македонија го изразува своето длабоко несогласување со оваа одлука на претседателот која оневозможува преку регуларна судска постапка да се открие целата вистина околу оваа афера која предизвика сериозна политичка криза во земјата“, потенцираат од партијата.
Од друга страна, со ваквиот акт се оневозможува дел од осомничените во регуларна судска постапка да ја докажат својата невиност за да не го носат жигот на аболиран носител на јавна функција.
Иако претседателот во своето обраќање до нацијата укажува дека одлуката ја донел самостојно, без консултација со политичките партии, а со цел заштита на државните интереси на Република Македонија, реакциите после овој чин ја зголемуваат нашата загриженост за натамошниот развој на настаните кои како партија внимателно ќе ги следиме и соодветно на тоа ќе ги презентираме нашите ставови, велат од Демократската партија на Турците.