Во првиот квартал од оваа година во државата се регистрирани 9.075 слободни работни места од кои, според дејности, најмногу (2.482) во преработувачката индустрија, објави Државниот завод за статистика. Најголема стапка на слободни работни места од 4,1 отсто има во секторот административни и помошни услужни дејности, а најмала е во секторот образование каде изнесува 0,47 проценти.
Деловните субјекти со број на вработени од 10 до 49 имаат највисока стапка на слободни работни места што изнесува 2,22 отсто. По региони, највисока стапка на слободни работни места има на југоистокот – 2,80 отсто.
Според занимања, најмногу слободни работни места, односно 2.878, има во петтата група – работници во услужни дејности и продажба. По нив следи групата техничари и сродни занимава со 1.668, потоа групата елементарни заминавања со 1.263, ракувачи и составувачи на машини и постројки – 1.058, итн. Регистрирани се и 720 слободни работни места од занимањето службеници, 609 во групата стручњаци и научници и 34 во групата занимања членови на законодавни и извршни тела, државни функционери, раководни државни службеници, дипломати и директори.
Гледано по дејности, статистиката евидентира најмногу слободни работни места 2.482 во преработувачката индустрија, по што следат трговијата на големо и трговијата на мало и поправка на моторни возила и мотоцикли со 1.695, па административните и помошните услужни дејности со 933. Во градежништвото треба да се пополнат 803 работни места, во дејноста транспорт и складирање 569, објекти за сместување и сервисни дејности со храна 419, итн.