Државниот санитарен и здравствен инспекторат соопшти дека извршиле вонреден инспекциски надзор во Воспитно поправниот дом во Тетово каде констатирале дека штитениците примаат терапија која е уредно заведена.
Инспекторите се испратени во оваа институција по алармирањето од Народниот правобранител дека штитениците оваа установа при последната контрола биле затекнати под силна терапија со седативи, антидепресиви и други лекарства за психички растројства.
-Во установата има згрижено вкупно 12 на штитеници, на возраст од 16 до 22 години, од кои 5 малолетни. Здравствена заштита им е обезбедена преку ЈЗУ Здравствен дом Охрид-доктор од Итна медицинска помош. Редовните посети од страна на докторот се еднаш неделно, а на повик секогаш во првите 24часа од прием на секое ново лице во установата. За извршените здравствени услуги се води уредна евиденција. Во однос на терапијата која им се ординира на штитениците во КПУ Охрид, од извршениот надзор во ЈЗУ Општа болница Охрид констирано е дека терапијата е врз основа на специјалистчки извештаи (прегледи) од психијатри вработени во ЈЗУ ОБ Охрид. За двајца од штитениците терапијата е дадена врз основа на нивната предходна хоспитализација во ЈЗУ УК за психијатрија Скопје. За следење на здравствената состојба на штитениците се вршат редовни прегледи што се потврдува со приложените специјалистички извештаи од мај, јули, септември и октомври оваа година, се вели во соопштението од ДСЗИ.
Во посебниот извештај на Народниот правобранител што го цитираше порталот СДК.мк стои дека „од увид во медицинските досиеја при посетата во јули, констатирано е дека сите деца од ВПД ‘Тетово’ примаат јака седативна терапија препишана од матичен лекар од Здравствен Дом Охрид или од специјалист доктор невропсихијатар, психијатар. Терапијата се состои во повеќекратни дози во текот на денот, (а особено во вечерните часови), при што им се препишани следниве лекарства за смирување: Дијазепам, Хелекс, Мендилекс, Депакине, Рисперидон и други, од 5 до 20 милиграми дневно, што со оглед на возраста на децата е многу силна доза“.
Забелешките на Народниот правобранител се дека се продолжувало со терапијата без вработените во ВП Дом „Тетово“ да ги однесат на контрола овие „пациенти“ и да побараат повторно мислење од невропсихијатрите.
-За Народниот правобранител крајно неприфатливо е да не се следи состојбата на децата со таква сериозна терапија и да не се посвети внимание на симптомите кои јасно ги опишуваат и самите деца, па во тој контекст да се побара повторно мислење за пропишаната терапија од соодветно медицинско лице, се вели во извештајот.
Заменик народниот правобраните Васка Бајрамовска Мустафа вели дека „впечаток е дека поради јаките дози од терапијата која ја примаат, повеќето од нив немаат јасен фокус, делуваат отсутно и незаинтересирано за околината. Во таа смисла, неопходно е да се вршат чести контроли од страна на стручни лица – специјалист, доктор невропсихијатар или психијатар, со цел да се евалуира можноста за намалување на дозите на медикаментозна терапија која ја добиваат децата, а при тоа да се внимава на нивната психичка состојба“.




