Државниот санитарен и здравствен инспекторат во моментот изготвува решенија за самоизолација на 58 лица, контакти наседумте припадници од ЕБР позитивни на КОВИД-19 кои биле на заеднички настан во Охрид. Најголем дел од 58-те лица кои со решенија од среден и висок ризик одат во самоизолација се од настанот што се случувал од 8 до 14 мај во полициското одморалише во Охрид.
Од ДСЗИ за НОВА потврдија дека завршила епидемиолошката анкета и штотуку ги добиле податоците од Центрите за јавно здравје во Велес, Кичево, Струга и Охрид и во моментот работат на издавање на решенија за самоизолација. Денеска е завршена епидемиолошката анкета и во Скопје.
„Заврши епидемиолошката анкета, пред малку ги добивме резултатите и ДСЗИ е во постапка на издавање на решенија на 58 контакти од среден и висок и ризик. Тоа се лица, контакти на седмте полицајци од ЕБР, а најголем дел од нив се од присутните од настанот во Охрид“, потврди за НОВА, д-р Ирина Сотирова Бухова, директорка на ДСЗИ.
Станува збор за контакти од цела држава, а заедничко им е тоа што присуствувале на настанот во Охрид. Се претпоставува дека припадниците на ЕБР, се заразиле во приватно дружење меѓу себе. Тие заедно со припадници на АРМ обезбедувале државен карантин на луѓе што се вратиле од странство. Полициското одморалиште е затворено.