ДУИ до петок ќе донесат одлука кого ќе поддржат во вториот круг избори, односно дали ќе ги повикаат своите гласачи да се определат за владејачката ВМРО-ДПМНЕ, нивниот коалиционен партнер, или пак за здружената опозиција, која ја преводи најголемата опозициона партија СДСМ.
“Се уште немаме одлука”, изјави за НОВА портпаролот на ДУИ Бујар Османи, кој додаде дека се очекува на два дена пред изборите веќе да се знае нивниот став, со чија поддршка евентуално би се решила и победата на кандидатот за градоначалник на Скопје- Коце Трајановски или Јани Макрадули.
Ваквата политика на ДУИ за НОВА ја коментира влијателниот политички аналитичар Артан Зеколи: Сигурен сум дека Албанците нема да гласаат за ВМРО-ДПМНЕ. А што се однесува до ДУИ, се работи за теснопартиски интереси, променливи секој ден. Нивната политика е сосема различна за Скопје, Тетово и Гостивар. Оттука и доколку би се случила поддршка за ВМРО-ДПМНЕ од страна на ДУИ, се разбира дека тоа би значело поддршка и на проектот Скопје 2014, но нивната поддршка е одамна дадена, не само на ДУИ туку и на ДПА и генерално за сите политики на ВМРО-ДПМНЕ.
Но, што сторија и СДСМ да ги привлечат Албанците за да гласаат за нив? Тоа е исто така важно прашање, како и прашањето- зошто не ги прашаа Албанците што би сакале да сторат за нив, за нивните интереси, нивната визија за градот, вели аналитичарот Зеколи за НОВА.