ДУИ сериозно ја разгледува можноста за напуштање на владата со ВМРО-ДПМНЕ односно техничката влада која е во функција, изјави денеска портпаролот на ДУИ, Бујар Османи за време на одржувањето на централното претседателство на оваа партија во Мала Речица.
Според него на седницата на централното претседателство, каде дебатата е се уште во тек, на дневен ред има две точки, меѓу кои и разгледување на можноста за напуштање на техничката Влада од страна на функционерите на ДУИ.
„Веќе во структурите на ДУИ се разговара дека една таква можност би можело да придонесе кон деблокирање на состојбата, членовите на претседателството ги разговараат аргументите „за“ и „против“ оваа опција. Дел од аргументите се дека при давање на оставка министрите ќе мора да останат на местата до именување на новата Влада но има и други аргументи коишто велат дека оставката би ја деблокирала состојбата.
Втората точка се локалните избори. Според Уставот, мандатот на градоначалниците е четири години, веќе следната недела тие поминуваат и настапува еден правен вакум со функционирање на општините. ДУИ ќе разговара и за овој вакум како и за можните кандидати за градоначалници на локалните избори и самиот процес на закажување на локалните избори“, изјави Османи.
Седницата на централното претседателство е во тек.