ДУИ на чело со Али Ахмети оди во САД
Висока делегација на ДУИ предводена од лидерот Али Ахмети од 4 мај ќе престојува во двонеделна посета на САД. Оваа информација ја потврдија за „Дневник“ од ДУИ.
Делегацијата на ДУИ ќе ја предводи претседателот на партијата Али Ахмети, кој освен во Вашингтон, ќе престојува и во Њујорк и во Чикаго. Во текот на посетата лидерот на интегративците ќе има средби со претставници на државната администрација на САД, како и со конгресмени, бизнис-лобито и со албанската дијаспора.
Во партикста делегација покрај Ахмети одат и вицепремиерот Муса Џафери, потпретседателот на партијата, Изет Меџити и градоначалникот на Kичево, Фатмир Дехари.
Во ДУИ не кријат дека прашањето на името ќе биде централен момент кој ќе доминира на средбите на Ахмети со претставници на државната администрација на САД.
– Посетата на претседателот на САД доаѓа во интересно време кога гледаме една засилена преговарачка и дипломатска активност во регионот. Важно е што посетата ќе следува по склучувањето на договорот меѓу Kосово и Србија. Очекуваме на средбите на Ахмети со официјални претставници на САД да се разговара за напредокот на Македонија кон НАТО, односно за сите прашања што се битни за напредокот на земјава, вклучително и прашањето за името. Очекувано е на средбите особено да доминира прашањето за името – велат за Дневник од ДУИ.
Али Ахмети во колумна неодамна му се обрати на премеиерот Груевски со поракиа дека е дојдено времето за крупни одлуки кои државата ќе ја интегрираат во евроатлантските структури.