ДУИ вечерва кампањата за локалните избори ја продолжи од Долнени во Пласница. Партијата ги претстави кандидатите за градоначалници на Долнени и на Пласница, Урим Ибески и Алија Јаоски, како и листата на советници.
Лидерот на ДУИ, Али Ахмети пред жителите на Долнени и на Пласница рече дека изборната платформа на неговата партија се базира на Зелената агенда која гарантира подобар квалитет на животот за сите граѓани на Пласница.
– Никој не веруваше дека во оваа земја ќе се постигне заедниците да се разбираат меѓу себе, има уште многу работа, дали има предрасуди, се разбира дека има. Оваа земја наскоро ќе биде дел од ЕУ и верувам дека оваа земја има капацитет да ги придвижи работите напред. Денес сме со нова агенда, многумина имаше дилеми, но ние излеговме со оваа платформа. Значи, оваа платформа е живот, таа е за свеж воздух. На Алија Јаоски како кандидат за градоначалник, ние ќе му стоиме блиску и мора да го поддржиме и да излеземе со бел образ, нагласи Ахмети.
Кандидатот за општина Пласница, Алија Јаоски побара поддршка од жителите за да продолжи понатаму со реализација на проектите што се во изборната програма за општина Пласница. Тој кажа дека главниот мотив да се кандидира за функцијата на чело на општината се токму младите и Зелената агенда.
– Од сите проекти што ги испративме до различни министерства, сите се одобрени и имплементирани. Заблагодарувајќи им се на пратениците и министрите за регионалниот пат кој се гради и е во завршна фаза што ќе им служи на сите граѓани. Би сакал да нагласам една многу важна работа, благодарение на првиот вицепремиер Груби, вработените врз основа на Охридскиот Договор се распределени на работни места во Кичево и Македонски Брод. Ви ветувам на сите дека ќе работиме уште понапорно за вработување на младите луѓе во различни институции, вклучително и на раководни позиции, и имам порака дека младите треба да продолжат со високото образование, кажа Алија Јаоски во својот говор пред жителите на Долнени.
Кандидатот за градоначалник на Општина Долнени од редовите на ДУИ, Урим Ибески од жителите побара поддршка за, како што рече, да продолжи понатаму со реализација на проектите што се во изборната програма за општина Долнени. Тој рече дека главниот мотив да се кандидира за функцијата на чело на општината се токму младите и Зелената агенда.
– Задоволство ми е да се појавам пред вас како кандидат на ДУИ, овој предизвик е полн со одговорност за подобар живот на жителите овде, за заедно да го продолжиме патот на развој на општината. Економијата и намалувањето на невработеноста и еднаквоста за мене се почетна точка, ние мора да продолжиме со реализацијата на веќе започнатите проекти. Да и дадеме сјај на нашата општина и да ја направиме добра за живеење за сите нас. Знам и верувам дека ќе го видите вистинскиот пат, пред да почнам да раскажувам за нашата кампања, нема да биде само ова напишаното туку и повеќе затоа што имаме поддршка од Владата и ДУИ. Довербата на граѓаните е аманет која не треба да се заборави. Пред почесниот градоначалник Ахмети, давам збор дека ќе го искористам целиот мој потенцијал, дека навистина ќе му служам на народот и ќе ја барам вашата поддршка, драги граѓани, нагласи во својот говор, кандидатот на ДУИ за општина Долнени , Урим Ибески.