По најавата на лидерот на СДСМ, Зоран Заев дека доколку не се исполнат два услови – повлекување на аболицијата и одложување на изборите, тој нема да присуствува на закажаната лидерска средба во Виена, со реакција се огласија и ДУИ, кои се уште остануваат на ставот дека треба да се оди во Виена.
„За условите кои денеска ги постави Заев, треба да се произнесат организаторите на средбата“, изјави портпаролот на партијата, Артан Груби за НОВА.
Од ВМРО-ДПМНЕ, велат дека лидерот на СДСМ, Зоран Заев со денеска претставените услови за учество во преговорите во Виена, уште еднаш покажал дека не се грижи за иднината на Република Македонија, за стабилноста и за немирот кој секојдневно го внесувал помеѓу граѓаните.
„Во овие денови кога нема граѓанин што не е загрижен за актуелната состојба и кога нема Македонец кој не очекува излез од кризата во која што СДСМ и Заев ја втурнаа земјата, тој продолжи со уцени и условувања кои ја туркаат државата надолу и ја продожуваат кризата до недоглед. Зоран Заев денеска донесе неодговорна и деструктивна одлука бегајќи од разговори со кои треба да се трасира патот кој води кон избори и кон решавање на кризата. Зоран Заев денеска и заврти грб на Македонија и потврди дека неговата намера е продлабочување и ескалирање на кризата, затоа што тој и луѓето околу него можат да функционираат и да привлечат внимание само во време на криза, изјави членот на ИК на партијата, Илија Димовски.
Претседателот на Собранието Трајко Вељаноски денеска соопшти дека нема да свика седница на Собранието за да ја отповика одлуката за распишување избори на 5 јуни затоа што смета дека тоа би било грубо кршење на Уставот.
„Согласно членот 63, став 6 од Уставот, цитирам: ‘Собранието се распушта ако за тоа се изјасни мнозинството од вкупниот број пратеници’. Во контекст на ваквата уставна одредба, сакам уште еднаш да потенцирам дека пратениците од осмиот состав на македонскиот парламент, ваква одлука со значително мнозинство веќе донесоа, односно тие се распуштија. Тоа во суштина значи дека било какво свикување седница на која би присуствувале пратеници кои самите веќе донеле одлука за свое распуштање е во целосна спротивност со Уставот како највисок правен акт во државата. Во оваа смисла, сакам да и укажам на македонската јавност дека највисоката институција за оценка на уставноста – Уставниот суд уште пред една деценија има расправано и одлучувано во врска со споменатото прашање при што, крајно логично заклучува дека, цитирам: ‘со Уставот не е утврдено мандатот на пратениците во Собранието да продолжи во случај на распуштање на Собранието, ниту е предвидено во таков случај тие да продолжат со должноста’.
Врз основа на споменатото, повеќе од јасно е дека уставните норми што се однесуваат на почетокот, траењето и завршувањето на мандатот на пратениците се сосема јасни и недвосмислени, при што секое свикување седница на веќе распуштено Собрание, би претставувало грубо кршење на Уставот на Република Македонија“, се вели во неговото соопштение.
Од Кабинетот на претседателот Иванов засега не се достапни за коментар за условите кои ги постави Заев.
Лидерот на СДСМ Зоран Заев на денешната прес конференција соопшти дека неговата партија нема да учествува на лидерската средба во Виена со посредство на европски претставници, доколку претходно не бидат исполнети два предуслови.
„Иванов да ги повлече срамните одлуки за помилување по налог на Груевски и спротивни на Уставот и да се свика Собранието за да ја повлече одлуката за одржување на избори на 5 јуни, се до исполнување на условите за одржување демократски, фер и кредибилни избори. Ако сакаат Иванов, Груевски и Вељаноски, одлуката може да се смени за два часа, рече Заев.
Доколку овие услови не бидат исполнети Заев најави дека СДСМ нема да учествува на средбата во Виена.