Првиот евроинтегративец Фатмир Бесими и денеска не откри детали за неговата посета на Атина и дали средбата со шефот на грчката дипломатија Аврамопулос може да донесе позитивен чекор за надминување на спорот со името.
Токму во пресрет на Денот на Европа Бесими ја посети Атина и се сретна со Аврамопулос преземајќи дел од задачите што до сега ги имаше само Министерството за надворешни работи.
Од МНР не ја коментираат посетата на Бесими во Атина, ниту фактот што тој таму не се сретна со нему рамниот по ранг – потпретседателот на грчката Влада, туку со шефот на грчката дипломатија.
Нема коментар ниту дали на овој начин е прескокнат македонскиот министер за надворешни работи Попоски. Нема реакција ниту од владата.
Владиниот портпарол Ѓоргиев потсети дека преговорите за името не се водат на билатерални средби во Атина, туку во Њујорк, под покровителство на Обединетите нации.
Офанзивата на ДУИ за конечно решавање на спорот околу името и одблокирање на закочените евроинтеграции ја продолжува и лидерот на партијата Ахмети во САД.
Ахмети по средбите со високи американски претставници упатил порака дека топката сега е на наша страна и оти Македонија е таа што треба добро да изигра.
Утре Ахмети во Њујорк ќе се сретне со медијаторот Метју Нимиц.