Откриена е уште една пратка на сомнително канцерогено млеко „Моја кравица“ со рок на траење до 14 август 2013 година. Според Агенцијата за храна и ветеринарство млекото се наоѓа во еден од магацините во државата и не е пуштено во продажба.
– Инспекторите од Агенцијата зедоа мостри од наведениот производ со цел да се потврди резултатот и со истиот ќе се постапува во зависност од лабораторискиот извештај велат од Агенцијата.
Од добиените резултати на анализите од млеката кои во моментот се испитуваат утврдено е зголемено присуство на афлатоксинот М1 во уште еден производ по потекло од Хрватска.
– Станува збор за производот “Млеко Дукат УХТ 2,8%ММ +7 витамини 1Л“, со рок на траење до 19.04.2013 година. Целата количина од овој производ околу 2.000 литри, се наоѓа во магацинот на увозникот и не е пуштена во промет. Ова млеко деновиве ќе биде уништено. Останатите 35 производи од наведената пратка се исправни и тие ќе бидат пуштени во продажба велат надлежните.
Во меѓувреме Дукат одлучи да ги повлече сите трајни млека од продавниците кои се наоѓаат на македонскиот пазар, иако Агенцијата за храна и ветеринарсво потврди дека се безбедни.
Останатите млечни производи, јогуртите, киселите млека, сирењата, намазите, нема да бидат повлечени од пазарот бидејќи веќе биле проверени и исправни.
Следната пратка од млеката на „Дукат“ која ќе биде внесена во државата освен на микробилошки анализи ќе подлежи и на испитување за афлатоксин М1 што производителот дополнитено го воведува за сите свои производи иако немаат законска обврска за тоа.
– Претставништвото на компанијата се одлучи на овој чекор со единствена цел, да ја врати довербата и сигурноста и да се избегне стравот при нивната консумација велат во Дукат.
Тоа значи дека производите кои ќе бидат испорачани набргу ќе бидат првите и засега единствени двојно проверени млека на пазорот.
Останува нејасно како ниту една од сомнителните пратки со канцерогено млеко не се нашла на рафтовите во македонските маркети, туку само во магацините на дитрибутерите.
Добро упатени извори за НОВА велат дека пред нова година само во еден ден во Македонија влегле огромни количини на млеко од увоз.
Сепак, надлежните смируваат бидејќи сега секое млеко пред да оди во продажба се испитува дали содржи зголемни количини на афлатоксин М1.
Од друга страна експертите не препорачуваат да се купува млеко директно од производителите бидејќи тоа, пак воопшто не е испитано.