Дуќанџиите во Старата скопска чаршија не се информирани за намерата за унифицирање на излозите, рекламите и фирмите.
Се чини, повеќе се загрижени што ќе треба да вложуваат дополнителни пари, отколку што ќе се смени изгледот на сокаците во Чаршијата.
Загриженоста кај занаетчиите доаѓа откако Министерството за економија најави дека нема повеќе различно димензионирани излози на ист тип занаетчиски дуќани во Старата чаршија, едни со дрвени ќепенци, а други со пластични ролетни. Нема да има ниту букви со различна големина и различно осветлување на фирмите на дуќанџиите.
Разноликоста и шаренилото на излозите ќе бидат заменети со унифицирани излози по големина, и тоа за златарите, за угостителите и за сите други занаетчии. Покрај тоа, по еден урнек, користејќи исти симболи и големина на букви, ќе се испишуваат и рекламите во чаршијата.
За некои од нив тоа е нов трошок, бидејќи веќе имале едно вложување, а за да се уреди, на пример еден златарски дуќан, како што објаснуваат златарите, се потребни дури 5.000 евра. Велат дека субвенциите од страна на државата, во висина од 100 до 1.000 евра се ситни пари, бидејќи само куклите на кои се редат златните предмети чинат 1.000 евра, пишува skopjeinfo.mk.
Со Законот за Старата скопска чаршија донесен од страна на Собранието на Република Македонија на 13 октомври 2008, чаршијата беше прогласена за културно наследство од особено значење и оттогаш е под трајна заштита на државата.