Букурешт: Два случаи на антракс и еден на маларија се потврдени во Романија. Националниот институт за воено-медицински истражувања и развој „Кантакузино“ синоќа ја потврди дијагнозата на антракс кај две лица примени во Националниот институт за заразни болести „Д-р Матеи Балс“ во Букурешт.
Министерството за здравство информираше дека двајцата пациенти се во стабилна состојба и под медицински надзор.
Едниот пациент има лесна форма на болеста, а неговиот син – со умерена, но без ризик од компликации. Пациентите добиваат третман и соодветна медицинска нега.
Министерството за здравство додаде дека пациентите преработувале и консумирале овчо месо од сопствената фарма. Според лекарите, постои минимален ризик од пренесување на болеста на луѓето.
Министерството за здравство во Букурешт синоќа потврди и случај на маларија во Букурешт.
Дијагнозата е потврдена кај 69-годишен маж од Букурешт, кој се лекува во Клиничката болница за заразни и тропски болести „Д-р Виктор Бабеш“.
Пациентот е во стабилна состојба и е подложен на специфичен третман.
Според достапните информации, тој не патувал скоро во странство. Дирекцијата за јавно здравје во Букурешт спроведува епидемиолошка анкета за случајот.