Посмртниците на двајцата мигранти од Бангладеш и Шри Ланка кои загинаа во сообраќајна несреќа во близина на Штип се изгубени во институциите на системот. Нивните тела цели 3 месеци се во капелата во Бутел
Ниту една институција не сака да ја преземе одговорноста за да се погребат телата на двајцата мигранти кои цели три месеци стојат во капелата во Бутел. Институциите си ја префрлаат топката едни на други и кругот се врти, а телата нема долго да издржат, ќе се распаднат, велат во невладината организација Легис.
„ Во АД Бутел не ни ги даваат телата за да ги погребаме. Од таму бараат документ од Основно јавно обвинителство за да ни дадат дозвола за погреб. Но, од ОЈО велат дека таков докумнт досега не издале и топката ја префрлаат на МВР. Од МВР велат дека не се надлежни да издадат таков документ и дека тие својата работа си ја завршиле“, изјави Мерсиха Смаиловиќ од Легис.
Таа тврди дека се јавувале и во Град Скопје бидејќи тие, а не МТСП биле надлежни за мигрантите, но од таму немаат никаков одговор. И во АД Бутел ја прекинале комуникацијата со нив и повеќе не им одговараат на телефонските повици бидејќи од Легис побарале да им ги дадат телата за да ги погребат во некое село зашто трошоците во Бутел се големи.
Од друга страна во Институтот за судска медицина велат дека од МВР треба да им донесат службена белешка за тие да можат да издадат посмртница во АД Бутел.
„ Официјално, овие лица се уште не се умрени бидејќи ние немаме добиено службена белешка од МВР за да можеме да издадеме посмртница. Тоа треба да го направи одделението за потраги и странци во МВР“, изјави за НОВА директорот Александар Станков.
Тој нагласи дека мора да се знае и точната локација каде што ќе бидат погребани и за тоа да постои официјален документ бидејќи роднините имаат право да ги побараат телата и да си ги однесат во нивните држави.
Двајцата мигранти загинаа 25 јуни годинава во сообраќајна несреќа на магистралниот пат Радовиш-Штип, кога товарното возило со кое се превезувале мигрантите удрило во ограда од мост при што уште 17 мигранти беа повредени, а возачот избега од местото на несреќата. Овие млади луѓе транзитираа низ Македонија на пат кон европските земји.
Полицијата го знае идентитетот на еден од нив кој е од Бангладеш, а идентитетот на вториот кој е од Шри Ланка, не е официјално потврден.