Здружението за заштита на животните и животната средина ЕДЕН e револтирано од како што велат, секојдневната и агресивна бетонизација на Скопје, откако во изминатите два дена беа исечени сосема здрави борови пред Владата и два диви костена пред ресторанот „Пелистер“ на плоштадот „Македонија“ стари колку и Скопје, а пред тоа на истиот плоштад се исекоа 32 јавора.
„Кон овој список се приклучуваат и дрвјата пред „Бристол“, на Илинденска, Водно итн. Долг список, поразителен.
– Сите дрвја беа здрави и си ја вршеа својата улога на природни прочистувачи и разладувачи. Според канадската агенција за животна средина две дрвја произведуваат доволно кислород за едно четиричлено семејство зац цела година. Борот е прв на листата дрвја кои произведуваат најголемо количество кислород. Дали носителите на одлуки се свесни што значи ова за градот’, прашуваат од ЕДЕН.
Од таму напоменуваат дека во зима загаденоста во градов е еднаква на степенот на радиоактивност во Хирошима и Нагасаки, а граѓаните умираат од астма и разни други респираторни болести поврзани со лошиот квалитет на воздухот и недостигот од воздух.
„Ги повикуваме институциите, кои работат со државни пари и им должат отчетност и транспарентност на граѓаните, да одговорат врз која основа сечат здрави дрвја за кои потоа како одговор пласираат лажни информации дека дрвјата биле исечени бидејќи биле болни и трули? Кое сценарио треба да му се случи на Скопје за да стане јасно дека скопјани сакаат да живеат, а не да бидат живи погребани во бетон“, се вели во соопштението на ЕДЕН.