На раце и во носилки до операционите сали и на одделенијата. Вака се носат пациентите во Градската хируршка болница „Св. Наум Охридски“бидејќи единствениот лифт не работи уште од февруари. И покрај ветувањето на раководството на болницата дека лифтот ќе биде поправен за неколку дена, тој се уште не функционира. Реагираат и пациентите и лекарите.
„Пациентите се носат на носилка по скали , оперирани и тешко болни. Бидејќи ова е единствениот лифт во болницата нема друг начин како да се стигне до операционите сали или до другите одделенија“, велат лекари од болницата.
Ова е соопштението со кое уште на 10 февруари директорката Јасминка Чабуковска го известува медицинскиот персонал, итните пациенти да се пренасочуваат во други здравствени установи. Во известувањето стои дека лифтот ќе бил поправен во рок од три дена, до 13 февруари. Сега е април, а единствениот лифт во болницата се уште не работи.
Директорката Чабуковска тврди дека лифтот е стар и е предвидено да се замени.
„Во моментот тоа бара доработка на окно што е тешко изводливо бидејќи имаме пациенти. Затоа лифтот ќе се поправа и за таа цел се нарачани делови. Но и за тие да стигнат треба шест недели. Три веќе поминаа, така да се надеваме дека за три недели ќе стигнат деловите и лифтот ќе биде ставен во функција. Замената на лифтот ќе биде изводлива со целосна реконструкција кога ќе може да се доработи окното“, изјави Чабуковска за НОВА.
Во тек е реконструкција на болницата поради што болницата работи со намален капацитет. Реконструкцијата се одвива бавно, а како што пред два месеца најави министерот Тодоров болницата треба целосно да се затвори и за два месеца да заврши целиот процес, а пацие 
нтите да се пренасочуваат во болницата „8 Септември“.
Но, во ситуација кога болницата “8 Септември“ затвора цели одделенија и работи само со три операциони сали од вкупно седум, поради недостиг на медицински сестри, кога на скопските клиники се одлагаат операции бидејќи нема медицински потрошен материјал на пациентите пациентите нема каде да бидат згрижени и им останува само приватното здравство. Се разбира, тие што можат да си го дозволат тоа. Закажаните операции се одлагаат до недоглед, а се оперираат само итните случаи. Министерството за здравство досега не се изјаснило за ваквата вонредна состојба во работењето на болниците.