Во обидите да го напуштат Египет, уапсени се двајца истакнати членови на Муслиманското братство, јавуваат светските агенции. Премиерот Хазим Беблави ги предупреди САД дека би направиле грешка доколку ја суспендираат годишната воена помош на Египет.
На границата со Либија уапсен е висок функционер на Братството, Сафват Хегази, баран за поттикнување насилство.
На аеродромот во Каиро минатата вечер, додека се обидувал да среди лет за Италија, уапсен е и портпаролот на Муслиманското Братство, Мурад Али.
По апсењето на лидерот на Братството, Мухамед Бади, коалицијата на Муслиманското братство најави одржување на „голем собир“.
Со тој протест, ќе упатат повик до демонстрантите да продолжат со барањата да се ослободи поранешниот претседател Мухамед Морси.
Белата куќа претходно соопшти дека претседателот на САД, Барак Обама со своето раководство ќе ја разгледува можноста да ја суспендира воената помош кон Египет.
„Да не се заборави дека Египет преживеа со воена помош на Русија. Значи, не би било крај на светот“, рече Белбави коментирајќи ги изјавите на Белата куќа.