Египетската полиција го уапси Мохамед ел-Белтаги, уште еден од поважните лидери на Муслиманското братство, пренесува „Ал Џезира“.
Белтаги, поранешен член на парламентот и шеф на партија Слобода и правда, е уапсен во Гиза близу египетскиот главен град, пренесува државната телевизија.
Тој е баран под обвинение за поттикнување насилство а властите го гонеа речиси три недели.
Во видео-снимка емитувана неделава на „Ал Џезира“, Белтаги изјави дека властите во Египет се обидуваат да ја преобразат „политичката криза“ во проблем со безбедноста обвинувајќи ја неговата група за организиран тероризам.
„Немојте да дозволите да бидете излажани преку овие измами насочени да не поврзат со тероризам, насилство и убиства…во време кога врвот на овој режим е облиен со крв“, изјави тогаш Белтаги.
Тој изминатиот месец се криеше откако властите насилно ги растргнаа демонстрантите – симпатизери на претседателот Мохамед Морси, кој беше симнат од власт од страна на војската на 3 јули.
По падот на Морси, во речиси два месеца, повеќето од лидерите на Братството беа уапсени.
Главниот координатор на групата, Мохамед ел-Бади беше уапсен на почетокот на месец август. Тој се соочува со обвиненија за поттикнување насилство, како и неговиот заменик Рашад ал-Бајоми и „мозокот“ на групата Каират ал-Шатер.