Европската унија очекува претседателот Ѓорге Иванов да изврши итна консултација со политичките сили во земјата и да определи лидер за формирање на влада составена од стабилна, солидна и одговорна коалиција, откако ВМРО ДПМНЕ и ДУИ вчера не постигнаа договор за формирање влада.
Ова денеска на прес-конференција го изјави портаролката на Европската комисија Маја Коцијанчич. Во име на официјален Брисел таа рече дека „земјата нема време за губење“.
– Ги повикуваме сите политички актери во земјата, вклучително и претседателот, да делуваат на смирен и конструктивен начин со целосна одговорност за решавање на сегашната состојба, бидејќи дека земјата нема време за губење и во овој поглед очекуваме претседателот, според Уставот, да изврши итна отворена консултација со политичките сили во земјата и брзо да определи лидер за формирање на Влада, кој ќе може да најде заедничко тло за формирање на стабилна, солидна и одговорна коалиција, изјави Коцијанчич.
Откако претседателот Иванов му го даде мандатот на лидерот на ВМРО ДПМНЕ Никола Груевски пред 20 дена, портпаролката на Европската комисија Коцијанчич изјави дека ЕУ oчекува брзо формирање на нова влада и спроведување на реформите.
– Се надеваме на брзо формирање на новата влада со широка политичка поддршка која ќе овозможи имплементирање на сите делови од Договорот од Пржинo и Итните реформски приоритети, изјави Коцијанчич.