Движењето „Еко-герила“ побара од надлежните институции да ги гонат лицата кои преку своите постапки го загрозуваат здравјето на тетовци.
Тие реагираа на пожарот што денеска ја зафати дивата депонија на влезот во Тетово.
Според оваа невладина организација ова е кулминација на бавната смрт на идните генерации, која трае со години и не завршува.
„Итно бараме од надлежните институции да ги изведат пред лицето на правдата одговорните лица кои преку своите кривични дела сериозно го загрозуваат здравјето и животот на граѓаните. По Југохром, главната причина за рак на животната средина во Тетово е оваа депонија. Гневот на граѓаните достигна вознемирувачко ниво поради долгото решавање на овој проблем. Затоа реакцијата ќе биде жестока и масовна“, порачаа од оваа невладина организација.