Бизнисмените Јордан Камчев, Цветан Панделески и Земјоделскиот комбинат „Пелагонија“ влегоа во сопствеништвото на една од најголемите фабрики за млеко и за млечни производи „Здравје Радово“, покажуваат денешните податоци од Централниот регистар. Мнозински акционери во ЗК „Пелагонија“ се познатата офшор компанија „Ексико“, „Орка Холдинг“ и Цветан Панделески.
Во јавноста одамна се шпекулираше дека Камчев влегол во „Здравје Радово“, меѓутоа официјално тоа се случи дури денеска.
Во сопственичката структура на „Здравје Радово“ остануваат Зоран Гудев и Јован Дабевски.
.jpg)
„Ексико“ е веројатно најуспешната анонима компанија во Македонија, иако е формирана уште во далечната 2001 година. Денес како нејзин сопственик се води швајцарската „T&MJ Инвестмент СА“ – лоцирана во Лугано, а на истата адреса регистрирани се уште десетици други фирми. За прв пат името на фирмата во медиумите се појави во 2005 година, кога весниците објавија дека „Ексико“ и „Мала Богородица“ имале градежни активности под хотелот „Панорама“.
Во изминативе години „Ексико“ се јави како акционер во „Стопанска банка АД – Битола“, Земјоделскиот комбинат „Пелагонија“ и во познатата градежна компанија „Бетон“ АД – Штип. „Ексико“ свој удел има и во хотелот „Ибис“ кој се наоѓа во непосредна близина на скопскиот плоштад, веднаш до новото седиште на „Комерцијална банка“.
Портпаролот на СДСМ, Петре Шилегов, лани на прес-конференција праша дали шефот на тајната полиција и братучед на Груевски, Сашо Мијалков, стои зад „Ексико“. Мијалков демантираше, најави тужба против Шилегов, меѓутоа досега никој не објасни чија е „Ексико“, ниту пак се појави нејзиниот вистински газда.
„Фокус“ минатата година пишуваше и дека „Ексико“ и познатата агенција за обезбедување СГС, делеле иста адреса.
