„Иако убедливата победа што популистичките екстремно десничарски политички партии ја предвидуваа за неодамнешните избори за Европскиот парламент не се оствари, сепак, поддршката што ја добија, особено во земјите членки како Франција, Германија и Австрија, ќе има значително влијание врз политиката на ЕУ агендата за наредните години, не само онаа што се однесува на нејзината политика за проширување“, вели во ексклузивна изјава за „Фронтлајн“, Ерван Фуере, истакнат меѓународен експерт и дипломат, поранешен амбасадор на ЕУ во Северна Македонија, зборувајќи за новата реконфигурација на Европскиот парламент и интегративниот пат на земјата кон ЕУ.
– Иако постојат големи разлики во мислењата меѓу овие партии, сепак, тие имаат тенденција да бидат повнимателни во однос на идното проширување на ЕУ, честопати поврзувајќи го со токсичната дебата за имиграцијата. Ова ќе го отежни остварувањето на намерите на ЕУ за проширување во наредните години. Ќе биде од витално значење за земјите-кандидати да инсистираат на предностите за ЕУ со проширување на границите на мирот и безбедноста за да ги опфатат и балканските земји, како и Украина, Молдавија и Грузија. Ова е и најдобриот начин да се отфрли злонамерното влијание на Русија на Путин и неговото експанзионистичко однесување, нагласува Фуере.
Исто така, додава нашиот соговорник, од витално значење е македонските партии да изградат силен консензус за многу потребните реформи, особено во елиминирањето на корупцијата и промовирањето на независноста на судството.
– Колку повеќе можат да ја покажат својата посветеност кон овие реформи и нивното ефективно спроведување, толку подобро ќе биде земјата да ја постигне својата цел за членство во ЕУ, изјави познатиот дипломат во ексклузивната изјава за Фронтлајн.
Дестан Јонузи / Фронтлајн