Лекарите со наведнати глави ја примија веста за изборот на ТОП 100 најдобро рангирани доктори во здравството за месец феруари. Не комeнтираат но, само велат дека не им е јасно според кои критериуми наградените лекари се нашле на листата на министерот Тодоров.
Според Дејан Ставриќ, прв човек на Синдикатот на клиниките и очен хирург, изборот на ТОП 100 најдобро рангирани доктори не е објективен и е направен според личен избор на министерството за здравство. Ставриќ објаснува дека на секоја клиника лекарите кои работат според проектот „плаќање по успешност“имаат коефициент единица, а еден од нив е избран.
Затоа прашува што повеќе направил, токму тој лекар што е награден за да се најде на листата на министерството за здравство.
-Изборот не е објективен и не знам по кој критериум е направена проценката, каде се тука останатите 7.000 лекари во здравството. Сметам дека ваквиот избор е направен според потребите на министертвото за здравство изјави за НОВА Ставриќ.
Експертската јавност не сака да ја коментира најновата одлука на министерството за здравство, според која лекарите што најмногу се залагале во работењето во месец феруари добија парична награда од 30. 000 денари, како и право на вршење на дополнителна дејност во која здравствена установа тие сакаат да прегледуваат приватно, надвор од работното време.
Неколкумина од експертите кои работат на оваа проблематика, за НОВА велат дека креваат раце од било каков коментар, бидејќи како што велат, што и да кажат веќе нема никаква смисла.
Тие велат дека сакаат да го постигнат ефектот власта да почуствува како е кога ќе изостане стручен став за секоја новонастаната ситуација, бидејќи очигледно државата сака граѓаните да го знаат она што тие им го сервираат.
Одлуката одби да ја коментира и самиот Владимир Лазаревиќ, еден од креаторите на реформите во здравството и поранешен заменик министер за здравство во една од претходните гарнитури поставени од оваа власт.
Лекарите пак, оние што денот го поминуваат во операцините сали или во амбулантите со пациентите,оние што се во првите борбени редови кога се спасува живот, денеска останаа со наведната глава. Не сакаа ништо да коментираат.
Единствено професорот, абдоменалниот хирург Милчо Пановски изјави дека ваквиот избор на Министерството не ја отсликува реалната слика.
-Власта прави театар и сама си избира доктори кои смета дека се најработливи, изјави доктор Пановски.
На крајот од првиот квартал, според проектот „плаќање по успешност“ не само што се наградени ТОП 100-те најдобри доктори кои стануваат дел од „Клуб -100 најдобри доктори“, туку се избрани и 10 најдобро рангирани доктори специјалисти кои се наградени исто како и останатите.
Она што е интересно е дека дел од лекарите кои се наградени од Тодоров, штрајкуваа токму против проектот „плаќање според успешност“. На новинарско прашање за ова, Тодоров кратко прокоментира.
-Не ме интересира нивната политичка припадност и дали штрајкувале или не, изјави Тодоров.
Според него, изборот е направен спрема воспоставени критериуми, бројот и типот на извршени интервенции, како и реализирани обуки.