Несериозно е политичари и политички партии, кои со ништо досега немаат придонесено за подобрување на квалитетот на македонското образование, сакајќи да се наметнат на јавноста, да ги критикуваат реформите кои влијаат на подобрување на обазованието, одговори ВМРО-ДПМНЕ на соопштението од Либералната партија (ЛП), во кое либералите го оценија екстерното тестирање на учениците како промашување.
„Неаргументираната критика на оваа реформа зборува само дека не им е ни најмалку важен квалитетот на образовниот процес, туку само добивање дневно-политички поени на сметка на учениците и наставниот кадар“, тврди ВМРО-ДПМНЕ.
Владејачката партија смета и дека со екстерното тестирање, кое годинава ќе се спроведе во сите училишта од 27.05 до 10.06, ќе се стави крај на необјективното оценување на дел од наставниците, но и дека „ќе се намали притисокот и уцените врз просветните работници од некои родители кои бараат повисоки оценки за нивните деца“.
Либералната партија, пак, ова го смета како признание дека Министерството за образование и наука не е во состојба да искорени поединечни слабости во оценувањето и својот неуспех го алиментира со екстерното тестирање, трауматизирајќи цела генерација основци и средношколци, нивните родители и наставниот кадар.
„Потсетуваме дека со спроведувањето на екстерното испитување, Министерството за образование и наука признава дека не е во состојба редовно да ја следи успешноста на наставниот процес. Тоа е внатрешен проблем на министерството, а не на учениците и наставниците, а поддржувајќи го екстерното тестирање, ВМРО-ДПМНЕ ја признава неуспешноста на сопствените реформи во образованието“, вели ЛП.
Партијата понатаму препорачува ВМРО-ДПМНЕ да бара “решение за проблемите што ги создаде согласно својата програма, наместо за нив да бара алиби во цела генерација ученици и нивните родители, наставници, педагози или во Либералната партија“, сметаат либералите и уште еднаш повикуваат да се прекине проверувањето на знаењето на учениците од основното и средното образование по пат на екстерно испитување.