Сите граѓани кои се здравствено осигурани до крајот на идниот месец треба имаат електронски здравствени картички бидејќи започнува нивната примена во праксата. Овие картички ќе ги заменат сините картони за лекарот да знае дали пациентот е здравствено осигуран или не, а не како што беше претходно предвидено да го содржат медицинското досие на секого.
Досега електронски картички добија само вработените во државните инситуции. Граѓаните велат дека не се многу заинтересирани за овој проект.
-Немам електронска картичка и немам намера да купам, бидејќи едно се кажува, а друго се прави вели една скопјанка.
Во Здружението на приватните лекари велат дека иако лекарите располагаат со читачи во своите ординации, проектот електронска здравствена картичка допрва треба да се тестира и да се анализира.
-На овој проект му треба време и мислам дека цела наредна година треба да се тестира за да се види како ќе функционира во праксата изјави Лилјана Чолакова Дервишова претседател на Здружението.
Иако беше предвидено да бидат бесплатни граѓаните картичките си ги купуваат самите, по 250 денари за секој член од семејството. Пензионерите и невработените за картичка треба да платат 100 денари. Во буџетот само за оваа намена од граѓаните ќе се соберат од шест до осум милиони евра. Досега се испечатени околу 700 000 картички што е третина од потребите во државата, а печатењето оди бавно.
Елекронските здравствени картички во државата се највуваат повеќе од една деценија. Во последните две години проектот доби друга димензија. Парите кои беа предвидени за оваа намена ги снема со ланскиот ребаланс на буџетот, а за годинава не се предвидени нови средства. Во нив не е предвидена база на податоци за болеста на пациентот, како што е секаде во свет со што картичките ја губат смислата на своето постоење велат експертите.
Заедно со електронската картичка пациентите треба да покажат и здравствена легитимација.