Градоначалникот на Шуто Оризари, Елвис Бајрам, откако пред десет дена беше претепан во Шутка не доаѓа на работа во општината. Тој земал боледување, но сепак собира сили за да оди на митинзи. Пред два дена, Елвис Бајрам, со завој на главата се појави на централниот митинг Шуто Оризари, заедно со лидерот на ВМРО-ДПМНЕ, Никола Груевски, и кандидатот за градоначалникот на Скопје, Коце Трајановски.
Кога денеска го побаравме градоначалникот Елвис Бајрам во општината оттаму ни одговорија:
„Градоначалникот е на боледување“.
На нашето прашање: „Како на боледување, кога завчера беше на митинг?
Од општината рекоа: „Па го видовте ли лекарот, цело време беше до него“
На митингот во Шуто Оризари, Бајрам ги повика своите сожители да гласаат за него и за ВМРО ДПМНЕ и ги предупреди дека ако другите дојдат на власт, може и нив како и него да ги тепаат.
,,Најпрво сакам да ги повикам нашите Роми кои што живеат во општина Шуто Оризари да сфатат дека наспроти паролата на СДСМ „живот доаѓа во Македонија“, животот не е дојден. Јас сакам да ги прашам сите дали животот доаѓа со вакви последици како што ми се случија на мене? Дали животот е тоа што треба да ме тепа и удира некој од нивна страна?“-рече од говорницата Бајрам.
Градоначалникот на Шуто Оризари, на 2. октомври бил нападнат и повреден додека одржувал средби со граѓаните како дел од предизборната кампања. Беше одвезен во Градската општа болница „8-ми септември“, каде му била констатирана осекотина од 8 сантиметри која била сошиена, немал скршеници, немал потрес и други повреди.
Неговиот татко Амди Бајрам се пожали на лошиот третман на неговиот син, градоначалникот Елвис Бајрам, и иако требало да остане уште неколку денови во болницата, тој го зел на домашно лекување, плашејќи се да не го отрујат.
Министерот за внатрешни работи, Оливер Спасовски изјави дека се поднесени кривични пријави за нарушување на јавниот ред и мир против осум лица меѓу кои е и Елвис Бајрам.
Амди Бајрам ги обвини СДСМ, пратеникот Курто Дудуш и Неждет Мустафа дека биле нарачатели на нападот врз неговиот син.
За инцидентот Амди Бајрам рече дека ќе бара оставка од Спасовски, бидејќи обвини за политичка монтажа и обид за убиство на неговиот син.
„Барав демократски и фер избори. Министерот вети дека нема да се гледа страна, но тоа не се случи. Тој е министер на сите граѓани, а не само на СДСМ. Лага е дека Елвис Бајрам со шест луѓе ги нападнал. Не нападнал Елвис. Министерот не си ја знае својата должност и според мене, целото сценарио е негово. Излегува и обвинува дека Елвис предизвикал општа тепачка, а тој бил нападнат со секири и шипки“, изјави Амди Бајрам.
Елвис Бајрам е два мандата на чело на општината, како кадар на Сојуз на Ромите, партија која е во коалиција со ВМРО-ДПМНЕ. И на претстојните избори тој повторно се кандидираше за градоначалник на Шуто Оризари.