Повторно пред да тргнеме прашувам за фискална сметка. Возачот ми се изнасмеа в лице. Рече дека нема да најдам такси возило што ќе ми даде сметка, но сепак ако сакам може да излезам и да си ја пробам среќата со друга компанија.
Утрово разбрав дека зборот фискална сметка во 5 часот наутро ги ококорува очите на такси возачите.
Марија Тодоровска
Петок, 5 часот наутро, барам такси возило и како и секогаш ги барам такси компаниите кои знам дека имаат коли во близина.
„Возило број 63 за 3 минути“, ми вели диспечерката од такси компанијата Палас.
Кога се качувам во колата забележувам дека таксиметарот го нема. И, додека се уште не сме тргнати на такси возачот му потенцирам дека сакам фискална сметка.
На тоа ми одговара дека нема апаратче и дека може да излезам од возилото и да си барам друго такси.
Во текот на ова лето во истите утрински часови се возев со истата компанија и до сега не сум ги потсетувала дека сакам фискална сметка. Тоа, впрочем се подразбира, нели?
Излегувам од првото ауто такси, стојам на тротоар, ѕвонам пак на истата такси компанија.
Диспечерката веќе запозната со она што се случило ми бара друг такси возач што ќе може да ми даде фискална сметка.
Пред да ми ја спушти слушалката таа јасно и како сосема да е нормално, онака рутински ме откачува.
Ми вели „нема во близина такси возило со фискална“.
Ѕвонам во друга компанија. Такси „Теникс“.
Возилото број 23 доаѓа на мојата локација.
Влегувам во возилото. И во него таксиметар нема.
Повторно пред да тргнеме прашувам за фискална сметка.
Возачот ми се изнасмеа в лице. Рече дека нема да најдам такси возило што ќе ми даде сметка, но сепак ако сакам може да излезам и да си ја пробам среќата со друга компанија.
Тргнувам да излезам од возилото, но сфаќам дека веќе доцнам и немам време да барам друго возило. Останувам во возилото на „Теникс“.
Возачот целиот пат ми објаснува како тоа они веќе со месеци работат без фискални сметки. Дури и ми вели дека имам среќа што во 5 часот наутро сум нашла такси, а камоли па такси со апаратче за фискална.
Му објаснувам дека во текот на летото сум се возела со нивната компанија и сум добила сметка.
Тој се смее и ми вели „нема шанси, си имала среќа!“.
Сум имала среќа да добијам фискална сметка!
И ме советува како треба секогаш кога ја кажувам адресата да потенцирам дека сакам такси возило со фискална.
И еве, утрово дознав дека имало такси со и такси без фискална сметка.
Па да бираш кое го сакаш. И утрово разбрав дека зборот фискална сметка во 5 часот наутро ги ококорува очите на такси возачите.